LAOAG CITY – Inadmitir ni Mr. Jhon Rey Salud, maysa a mannalon nga adda dagiti sumagmamano nga indibidual ditoy probinsia ti makaaw-awat ti ayuda manipud iti Department of Agriculture uray saanda a mannalon.
Segun kenkuana, saan a maliklikan nga adda ti kastoy a tumaod a problema tunggal adda ti ipaay a tulong manipud iti Department of Agriculture.
Inbatadna a napintas ti gagem ti programa ti gobierno ngem masapul a maarisit a naimbag ti pakaiyawatan a benepisiario tapno maipasigurado a maysa a mannalon ti mabenepisiaran.
Inlawlawagna a daytoy a parikot dagiti mannalon ket kangrunaan a mapagsasaritaan iti binulan a panagtataripnongda kaduana ti 30 a nagduduma a zanjera ditoy probinsia.
Gapu iti daytoy, kunana a namin-adun a daras nga inpadanonna dagitoy nga arungaing dagiti padana a mannalon iti maseknan nga ahensia ti gobierno nangruna no adda ti maiyuswat a System Management Community Meeting.
Mangnamnama ni Salud a masolbar daytoy a problema iti kabiitan a panawen tapno saan a kakaasi dagiti mannalon nga imbes a dagitoy ti makaawat kadagiti ayuda manipud iti Departament of Agriculture ket dagiti met saan a mannalon ti mabenepisiaran.
Immuna iti daytoy, inrakurak ni Sen. Raffy Tulfo nga adda dagiti maipagarup a makaaw-awat ti ayuda manipud iti Department of Agriculture a saan met a mannalon.
