LAOAG CITY – Inpadanon ni Vice Mayor Carlos Fariñas dagiti sumagmamano a topiko ken isyu ditoy ciudad iti biang ni Mayor Micheal Marcos Keon.
Daytoy ket kalpasan a simmangpet ti Mayor manipud iti isla ti Hawaii.
Dagiti nadakamat nga isyu ket maipanggep iti Laoag-Balacad road no sadinno nagreklamo dagiti motorista iti pannakabakbak ti nasao nga kalsada ken iti Brgy. 55-C Vira a maipanggep iti naperdi a kalsada a kaararamid kalpsan iti Bagyo Carina.
Malaksid iti daytoy, ket pakairamanan pay daytoy iti Day Care Center iti Brgy. Cabungaan-B a pinabakbak ti akinkua a lote.
Segun iti bise mayor, kalikagomna a maipatakder ti Day Care Center ti nadakamat a barangay gapu ta saanna nga ipalubos nga agklase dagiti agadadal iti barangay hall.
Maipalagip a nadutukan kas Acting Mayor ditoy ciudad ti Laoag ni Vice Mayor Fariñas iti uneg iti makalawas kabayatan nga adda iti isla ti Hawaii ni Mayor Keon para iti benchmarking.
