LAOAG CITY – Immapela ni Police Major Rommel Ramos iti PNP-Traffic Divison ditoy ciudad ti Laoag kadagiti tricycle driver a saan nga ag-over charge iti singir ti plete.
Daytoy ket kalpasan nga adda ti dimmanon a report a sobra ti panagsingir dagiti sumagmamano a tricycle driver kangrunaan na kadagiti Region 1 Athletic Association (R1AA) Meet.
Binalakadan ni Ramos ti publiko nga agreport iti opsina da ken masapol nga ammo da ti plate number ti tricycle tapno mabaayaban kasta met ti operator na.
Malaksid iti daytoy, agsango pay ti agrekreklamo ken ti driver ken no maduktalan a pudno ti reklamo ket maipaayan ti citation ticket.
Segun pay kenni Ramos, ti ummuna a panuusa iti daytoy ket agmulta ti 1, 500 a pisos, iti second offense ket agmulta ti 1,500 a pisos ken masuspenso ti panagpasada na iti makalawas ken iti third offense ket ti pannaka-rovoke ti franchise na.
