LAOAG CITY – Adda ti sumurok 15 a ribu nga indibidual ti nangiwayat ti tignay protesta idiay Israel tapno ipanawagan ti pannakawaya-waya dagiti hostage.
Daytoy ti naiget a kiddadawda ken ni Israeli Prime Minister Benjamin Netanyahu nga ummannugot para iti pannakawaya-waya dagiti nabatbati nga hostage.
Karaman iti tignay protesta dagiti kabagian ken supporters dagiti hostage nga iggem ti Hamas.
Pinalikawkawanda iti sibubukel a Paris Square iti Jerusalem idinto a dagiti dadduma ket adda iti Tel Aviv.
Naammoan a kadagupan iti 48 a bilang dagiti hostage iti Gaza ket mapattapatta nga adda ti 20 pay ti sibibiag.
Maipalagip a 251 nga indibidual ti hinostage ti Hamas iti panangrautda iti Israel idi Oktubre 7, 2023 no sadinno nga agarup 1,200 nga indibidual ti natay.
