LAOAG CITY – Inyalud-od ti Bureau of Internal Revenue (BIR) ti deadline ti filing ti 2025 Annual Income Tax Returns manipod Abril 15 agingga iti Mayo 15, 2026.
Segun iti ahensya, gagem daytoy nga ikkan ti naan-anay a panawen ti kada taxpayer tapno makaipila ti naimbag, kumpleto iti amin a kasapulan a dokumento, nga awan ti maipataw a penalties.
Mabalin a mangisumitir ken agbayad dagiti taxpayer iti babaen ti BIR electronic platforms wenno kadagiti Authorized Agent Banks.
Inlawlawag ti Bureau of Internal Revenue a ti pannakaitantan ti deadline ket paset ti addang tapno mapalag-an ti panagbayad ti buwis dagiti Pilipino, aglalo iti baet ti agtultuloy a panagngato ti presyo ti langis ken dagiti dadduma a kangrunaan a magatgatang.
Innayon ti ahensya nga agtultuloy dagiti programa da tapno maalay-ayan ti inaldaw a padagsen iti panagbiag dagiti umili.
