LAOAG CITY – Umabot iti sumurok 500k nga indibidual ti nairekord a naapektaran iti saan a nasayaat nga epekto ti habagat ken dagiti naglabas a bagyo a Luis ken Maymay.
Iti naudi a situational report ti National Disaster Risk Reduction and Management Council (NDRRMC), itay bigat Lunes, Agosto 10, umabot iti 585,993 nga indibidual wenno katukad ti 170,593 a pamilia ti naapektaran ti bagyo iti siyam a rehiyon.
Malaksid iti daytoy, umabot pay iti sumurok 4,800 nga indibidual ti nag-preemptive evacuation iti Region I, III, Calabarzon ken Mimaropa.
Na-displace met ti sumurok 32,000 nga indibidual bayat nga agtaltalibnaed met iti evacuation centers dagiti 293 a dadduma pay nga indibidual.
Iti agdama, walo ti nakumpirmaran a natay, 9 ti nasugatan ken idinto a maysa met ti manarimaan a mabirbirok.
