LAOAG CITY – Nakumpiskar ti sumurok-kumurang 340 a ribu a pisos a balor ti maatap a shabu nga agdagsen ti 50 a gramo.
Daytoy ket kalpasan a balligi a naarestar ti maysa a lalaki babaen iti Anti-Illegal Drug Buy-bust Operation iti Brgy. Gabut Norte iti ili Badoc.
Basar iti Provincial Drug Enforcement Unit iti nasao nga ili, nabigbig ti suspek a ni Adrian Aron Sanguir, agtawen ti 26, awanan asawa ken residente iti Brgy. Saludares iti ili ti Dingras.
Natiliw ti nasao a suspek babaen iti nagtipon a puersa ti Provincial Drug Enforcement Unit ken ti Philippine National Police iti ili ti Badoc.
Maibasar iti naiwayat nga imbestigasion, natiliw ti suspek kalpasan a napan nagideliver ti maipagarup a shabu iti paset ti Brgy. Gabut Norte iti ili Badoc.
Basar kadagiti otoridad ket naala pay manipod iti suspek ti maysa nga improvised glass tube a mapapati a nausar iti iligal nga aktibidad pakairamanan ti 1,805 a pisos a kuartana.
Naammoan a ti palawag ti suspek kadagiti otoridad ket nabaon laeng isuna a mapan ideliver ti maatap a shabu iti Brgy. Gabut Norte iti ili Badoc.
Kabayatanna, ti nasao a suspek ket maibilang nga High Value Individual ken manamnama a mapilaan ti kaso gapu iti panaglabsingna iti Republic Act No. 9165 wenno ti Comprehensive Dangerous Drugs Act of 2002.
