LAOAG CITY – Nakaro ti nagbalin nga epekto ti bagyo Uwan ti maikatlo a distrito ti Albay no sadinno nga immabot iti Signal No. 4 ti kapigsa ti angin.
Segun ken ni Albay Representative Raymond Adrian Salceda, nasapa a nangisayangkat ti preemptive evacuation ti amin nga ili ken ti ciudad iti nasao a distrito tapno masigurado ti kinatalged dagiti residente.
Mapatta-patta nga umabot iti 25,000 a pamilya ti naibakwit ngem mabalin pay a manayunan daytoy kabayatan ti panangberipikar dagiti lokal a gobierno.
Inbutaktak ni Salceda a naapektaran ti sumagmamano a lugar gapu iti pannakaipawil dagiti proyekto ti flood control, a rason met ti saan pay a pannakatarimaan dagiti nadadael nga istruktura sipud pay idi Bagyo Kristine.
Iti kangitingitan ti Bagyo Uwan, maipagarop a nangiyuswat dagiti otoridad ti sandbagging operations tapno malapdan ti iseserrek ti layos ken natalged a maibakwit dagiti residente.
Nupay kasta, narebba dagiti naikabil a temporaryo a pangdepensa kontra iti danom.
Nagpanawagan met ni Salceda iti Department of Public Works and Highways (DPWH) nga iprayoridad dagiti scientific ken evidence-based a proyekto para iti umiso a flood control idiay Albay.
Kabayatanna, agtultuloy ti relief operations kadagiti apektado a komunidad.
