LAOAG CITY – Nakitinnulong ti Department of Health (DOH) iti US Department of State tapno papigsaen ti panangduktal ken panangagas ti tuberculosis (TB) iti Pilipinas.
Segun iti Department of Health, nangipaay ti State Department ti umdas nga agas para iti 230,000 a pasyente, karaman ti 12 nga ultraportable X-ray machines.
Maipalagip nga idi Marso ita a tawen, inreport ti Department of Health nga adda ti 101,807 a kaso ti tuberculosis iti Metro Manila agingga idi Pebrero 16.
Agtultuloy nga ilunglungalong ti Department of Health ti nasapa a panangduktal, dagus a panangagas ken panangliklik kas paset ti kampanya kontra iti nasao a sakit.
Ti tuberculosis ket nagtalinaed nga umun-una a makaakar a sakit iti lubong, a nangitunda iti agingga ti1.23 milyon a pannakatay idi 2024, maibasar iti datos ti World Health Organization (WHO).
