LAOAG CITY – Naaprobaranen ti “supplemental budget” ti Provincial Veterinary Office ti Provincial Government of Ilocos Norte para iti pannakaisayangkat ti libre nga “operation kapon” para kadagiti lallaki a taraken nga aso.
Daytoy ti inpakaammo ni Provincial Veterinarian Dr. Loida Valenzuela kabayatan ti pannakaisayangkat ti binolan a pannakitaripnong ni Gob. Cecilia Araneta Marcos kadagiti department heads ken kadagiti kameng ti Sang. Panlalawigan nga idadauloan ni Bise Gob. Matthew Marcos Manotoc.
Mainaig iti daytoy, impalgakna a manamnama ti panangisayangkat da iti nadakamat nga aktibidad iti masungad a bulan ti Oktubre.
Inlawlawagna a plano ti PVet nga isayangkat ti nadakamat nga aktibidad iti dua a lugar ditoy probinsia.
Inbatadna nga iti agdama ket manarimaan pay laeng ti pannakikoordinar da iti lugar a pakaisayangkatan ti nasao nga aktibidad.
Innayon na a no addanto pay ti mabati nga anesthetics ket mabalin a mangisayangkat pay dagitoy iti sabali a rikus ti libre nga “operation kapon”.
