LAOAG CITY – Balligi a natiliw ti maysa a mannalon iti naisayangkat nga Anti-Illegal Drug Buy-bust Operation iti Bgry. 6 ditoy siudad ti Laoag.
Nabigbig ti suspek a ni Jefferson Ignacio y Querubin, agtawen ti 39, naasawaan, tubo idiay Ilagan, Isabela ngem agdama nga agnanaed iti Brgy. Nalasin iti ili ti Solsona.
Segun iti Provincial Drug Enforcement Unit, naala manipod iti suspek ti tallo a pedaso ti transparent plastic sachet a naglaon ti maipagarup a shabu.
Malaksid iti daytoy, nakumpiskar pay dagiti otoridad ti maysa a pedaso ti transparent plastic sachet a naglaon ti maatap a shabu a mapapati nga inlakona iti maysa a pulis a nagpammarang kas poseur-buyer pakairamanan dagiti dadduma pay a drug paraphernalia.
Basar iti imbestigasion dagiti otoridad, naikarga ti maipagarup a shabu iti short a pinick-up-na a parcel iti maysa a bus terminal.
Naammoan a maibilang nga Street Level Individual ti maseknan a suspek a nabayagen nga imonmonitor dagiti pannakabagi ti linteg.
Rumrummuar nga aglaklako ti maipagarup nga iligal a droga ti suspek banag a naigetna daytoy a naglikudan.
Kabayatanna, nagkedked nga agpainterbyu ti suspek ngem inpettengna a saan nga aglaklako ken agus-usar daytoy ti iligal a droga.
Iti agdama, adda iti kustodiar ti Philippine National Police ti suspek ken manamnama a mapilaan ti kaso gapu iti panaglabsingna iti Republic Act No. 9165 wenno ti Comprehensive Dangerous Drugs Act of 2002.
