LAOAG CITY – Kinumpirmaran ni Police Captain Sheryl Guzman, chief of police ti PNP-Burgos a nagpositibo ti search warrant operation nga inyuswat da iti pagtaengan ni Jayson Zambrano Respicio iti Barangay Nagsurot iti nasao nga ili.
Segun kenni Guzman, iti maysa a balay ni Respicio iti Purok Sinamar iti nasa a barangay ket nakaala da ti maysa a granada, maysa a homemade shotgun ken dua a bala ken iti maysa pay a balay da ket nakasukimat da ti 10 a bala ti kalibre 22 a paltog.
Gapo iti daytoy, sumango ni Respicio ti kaso a panaglabsing iti RA 9516 nga awan ti nairekomendar a pyansa na ken ti RA 10591.
Ummuna iti daytoy, inwayat ti PNP-Burgos ti operasyon kalpasan ti report ti impormante da nga adda ti ikot na a paltog.
Kabayatanna, ni Respicio ket isu ti makaswan ti murder gapo iti pannakatagtagbat a puon ti nakatayan ni Sheryl Ranay iti kallabes ken ti motibo iti daytoy ket old grudge.
Daytoy ket gapo ta maipagarop a ni Ranay ket kanayun na idi a kuykuyugen ti kabsat na a ni Gema Respicio nga asawa ni Jayson Respicio iti Barangay Hall ken PNP tapno ireklamo ti suspek iti RA 9262.
