LAOAG CITY – Naidungpar ti maysa nga SUV iti alad ti maysa a pagtaengan gapu iti walang nga aso iti paset ti national highway iti Barangay Nagbalagan iti ili ti Bangui ita a mismo nga aldaw ti Biernes Santo.
Ti nangiturong ti SUV a Platinum White Pearl Mica Toyota Veloz ket agtawen ti 46, private employee ken residente iti Barangay Luyon iti ili ti Luna, Apayao.
Basar iti Bangui Municipal Police Station, kabayatan a dumaldalyasat ti SUV nga agturong nga agpa-amianan ket kellaat a bimmallasiw ti maysa a walang nga aso iti kalsada.
Gapu iti daytoy, napukawan ti kontrol ti manibela ti driver agingga a naidungpar iti alad ti maysa a pagtaengan.
Nagsagaba ti sugat iti akinkannawan a takiag ti driver pakairamanan dagiti kaduana a nakalugan iti SUV a maysa a senior citizen ken ti ubing nga agtawen ti 10 nga agpapada dagitoy a naitaray iti Bangui District Hospital para iti pannakatamingda.
