LAOAG CITY – Inpakaammo ni Mrs. Estrella Baby Sacro, ti mangidadaulo ti Environment and Natural Resources ti Gobierno Probinsial a maiyawat ita a lawas ti sweldo dagiti Cash-for-work workers ditoy ciudad ti Laoag, iti ili ti Bacarra ken Vintar.
Inbatad ni Sacro a dagiti ummuna nakakumpleto kadagiti kasapulan a dokumento para iti panagsweldo dagiti mangmangged ket isuda met laeng iti ummuna a makaawat iti sweldo.
Reaksyon daytoy ni Sacro iti naidanon a reklamo iti Bombo Radyo mainaig ti saan pay a panagsweldo dagiti maseknan.
Inlawlawag ti nasao nga opisial a saan a dagus a maited ti sweldo dagiti maseknan no saan da a makompleto dagiti kasapulan a dokumento.
Inpasingked ni Sacro nga agtultuloy ti cash for work program ditoy probinsya tapno ad-ado pay dagiti matulungan nga umili.
