Naarestar ti tallo a benepisyaryo ti Social Amelioration Program iti Brgy. Naglicuan iti ili ti Pasuquin gapu iti iligal a panagsusugal.
Segun ken ni Pol. Capt. Christian Felix, chief of police iti PNP Pasuquin, adda ti naipadanun kadakuada nga impormayson seknan dagiti agsusugal iti nasao a barangay.
Kuna na a gapu iti daytoy, dagus a nangiyuswatda ti anti-illegal gambling operation iti nasao a lugar ket dita a naaktuan nga agay-ayam ti tong-its dagiti suspek nga isuda Teresita Sales y de Leon, agtawen 68, naasawan, housekeeper; Ernesto Agcaracar y Dalo, agtawen 48, naasawan, mannalon kenni Rushell Teves y Sales, agtawen 25, awanan asawa ken trabaho, agpapada a benepisyaryo ti SAP ken residente iti Brgy. Naglicuan.
Nakumpiskar manipod kadagiti suspek ti 310 a pisos a pusta ken ti inusar da a baraha.
Iti agdama, maisagsaganan ti maipila a kaso a panagsalungasing ti PD 1602 wenno ti illegal gambling law ken RA 1132 kontra kadagiti suspek.
