LAOAG CITY – Nakumpiskar dagiti otoridad ti tallo a shotshell ken lima a bala ti Calibre .22 iti naiwayat a Search Operation iti Barangay Sto. Niño iti ili ti Nueva Era.
Segun ken ni P/Capt. William Sotelo, Hepe ti Nueva Era Municipal Police Station, nabigbig ti subject iti operasion a ni Julius Sibbu, agtawen ti 42, naasawaan ken residente iti nasao met laeng a barangay.
Inbatadna a ti Search Warrant ket inparuk-at ni Hon. Bonhoefer Bernardez, Judge ti Regional Trial Court Branch 4 ditoy siudad ti Laoag gapu iti panaglabsing ti suspek iti Republic Act No. 10591 wenno ti Comprehensive Firearms and Ammunition Regulation Act.
Nupay kasta, inlawlawag ni P/Capt. Sotelo nga awan ti suspek iti pagtaenganda idi inwayatda ti Search Operation.
Kabayatanna, nagusar dagiti otoridad ti Body Worn Camera iti naiwayat a Search Operation.
