LAOAG CITY – Nagtalinaed iti kustodyar ti Philippine National Police dagiti tallo manipod kadagiti innem nga indibidual a natiliw gapu iti illegal a panagsusugal iti Brgy. 10 Barani iti ciudad ti Batac.
Daytoy ti inbatad ni Police Lt. Col. Adrian Gayuchan, ti chief of police iti nasao a ciudad.
Segun ken ni Gayuchan, saan pay a nakapagpiyansa dagiti tallo a suspek rason a nagtalinaed da paylaeng idi kustodyar ti pulisya.
Mainaig iti daytoy, kuna ni Gayuchan a dagiti tallo pay a natiliw ket menor de edad rason a naipasidong da iti City Social Welfare and Development Office.
Immunan a natiliw dagiti suspek kalpasan a naaktwan dagiti otoridad ti panagay-ayam da ti Pusoy Dos iti maysa a minatayan iti nadakamat a barangay no sadinno a nairekomendar ti piyansa da a sag-30 ribo a pisos.
Nakumpiskar dagiti otoridad iti lugar ti maysa a set ti baraha, 6 a monoblock chair, lamisaan ken P1,320 a pisos a maipagarop a pusta dagiti suspek.
Kabayatanna, kuna ni Gayuchan nga iyur-uray da laengen ti commitment order para iti pannakaiyakar dagiti suspek iti pakaibaludan da.
