LAOAG CITY – Natnag ti maysa a transit mixer truck iti derraas iti Brgy. Dadaor iti ili ti Bangui.
Basar iti Duty Investigator ti Philippine National Police iti nasao nga ili, nabigbig ti driver nga agtawen ti 47 ken ti helper daytoy nga agtawen ti 28 ken agpada dagitoy a residente ti Brgy. Pancian iti ili ti Pagudpud.
Inbatadna a basar iti insayangkatda nga imbestigasion ket kabayatan a dumaldalyasat ti transit mixer truck nga agturong nga agpa-abagatan ket apaman a sumalog iti lugan iti rangtay ket dita a kellaat a napukawan ti preno a nangitunda ti pannakaidungparna iti puon ti kayo ngem nagdirdiretso daytoy agingga iti derraas.
Inlawlawagna nga idi napanda nagresponde iti nakapasamakan ti aksidente ket dagusda nga intaray iti ospital dagiti maseknan gapu ta nagsagaba dagitoy ti sugat iti nagduduma a paset ti bagida.
Kunana nga awan dagiti nairamraman iti aksidente wenno dimmalyasat idi napasamak ti desgrasia.
Innayonna nga iti agdama ket ikarkarigatanda a maala ti nasao a lugan manipod iti derraas a nakatennaganna.
