LAOAG CITY – Dead on arrival ti lalaki kalpasan a napalto-paltogan idiay Barangay Alay, Badoc, Ilocos Norte.
Nabigbig ti biktima a ni Melchor Somera, agtawen ti 55, maysa a tricycle driver ken residente iti Sitio Nagbabaan iti nasao a barangay.
Basar iti inisyal nga imbestigasyon ti PNP-Badoc nga idadaulwan ni Police Lt. Noli Alejandro, ti officer in charge ti nasao nga ili, bayat nga iturturong ti biktima ti tricycle na ket kellaat lattan a pinalto-paltogan dagiti saan pay a nabigbig a suspek ken dagus a naglabas a nagpabagatan a direksyon dagitoy.
Segun kenni Alejandro, idi nagresponde da kalpasan a nakaawat da ti report ket nakita da pay laeng a nakamulagat ken dagus a naitaray iti ospital ngem naideklara a dead on arrival.
Inbatad na a nagsagaba ti uppat a tama ti paltog ti biktima a pakairamanan ti akin-kannawan a paset ti barukong na.
Inlawlawag na a maysa kadagiti kitkitaen da nga anggulo ket adda ti konsekyon na iti panagbalin a witness ti asawa ti biktima iti napasamak met laeng a pammaltog idi Diyembre itay napan a tawen.
Kabayatanna, inbatad ni Mr. Rufo Polandey, katugangan ti biktima a nasingpet daytoy ken awan ti nakaririri da iti lugar da.
Segun kenni Polandey, napan na intulod ti biktima ti asawa na iti sentro ti nasao nga ili ken idi sumrek a mapan iti barangay da ket maipagarop nga adda ti nangsurot kenkuana ken ditoy a napalto-paltogan.
Kunana a mabalin a ti rason ti krimen ket ti panagtestigo ti asawa ti biktima iti napasamak met laeng a pammaltog iti nasao nga ili.
Inlawlawag na nga awan met ti nakabasbasolan na iti barangay da.
Agtultuloy met ti naun-uneg nga imbestigasyon dagiti otoridad seknan iti nasao a pammaltog.
