LAOAG CITY – Kinumpirmaran ni Police Major Paul Benedict Parado, ti chief of police ti PNP-San Nicolas ti pannakatiliw ti maysa a tricycle driver iti Barangay 4 iti nasao nga ili.
Binigbig na daytoy a ni Felix Nacion, agtawen ti 52, naasawaan, maysa a tricycle driver ken residente iti nasao a barangay.
Segun kenni Parado, nakaawat da ti report nga adda ti nagpaputok ti paltog iti lugar da rason a dagus da a nagresponde ken ditoy a naduktalan da a positibo ti impormasyon gapo kadagiti tallo a kapsula a nabirukan da.
Nakumpiskar pay dagiti otoridad ti maysa a baby armalite nga adda ti magazine na a naglaon ti 18 a bala ken iti panagkapkap da ket nakaala da ti maysa a magazine nga addaan met ti 24 a bala.
Inbatad na a burburtiya para kadakuada no sadinno ti naggapoan ti nasao a paltog gapo ta basar iti nakalap da nga impormasyon ket nasayaat a tao ni Nacion.
Kunana a kalpasan daytoy ket dagus da nga inpaima iti crime laboratory ti paltog para iti pannaka-eksamin na.
Innayon na a pilaan da ni Nacion ti panaglabsing iti RA 10591 malaksid pay no agipila ti reklamo dagiti karruba na ti Alarm and Scandal.
Mainaig iti daytoy, naglikudan ni Nacion a napaputok ti paltog, ken nagkedkeden a mangipaay pay ti naan-anay pay a komento.
Naamoan a ni Nacion ket adda iti impluwensya ti nasanger idi maipagarop a nagpaputok ti paltog.
