LAOAG CITY – Kiniddaw ni Senador Bam Aquino a mangisayangkat ti panagdengngeg iti senado mainaig iti plano nga ipatungpal ti Department of Education (DepEd) a trimestral system para iti School Year 2026-2027.
Inbatad ni Aquino a kas Chairperson ti Senate Committee on Basic Education, napateg a matingiting ken mapagsasaritaan a naimbag ti reporma sakbay nga ipatungpal daytoy.
Kuna na pay a masapol a dumalan nga umuna ti nalawa a konsulatasyon ti gakat tapno masigurado a saan nga agdarasusos a mangipatungpal.
Innayon na a nupay suportado ti komite dagiti reporma a mangsolbar iti learning gap ken mapalag-an ti trabaho dagiti mangisursuro nga agdama a madagsenan iti non-teaching tasks.
Maipalagip nga immunan nga inrakurak ti Department of Education nga ad-adalen na ti mangipatungpal ti trimestral system kas paset ti maysa nga “holistic approach” para iti ad-adda a balance a time management dagiti agad-adal ken maipaayan ti naan-anay a panawen nga agisuro dagiti mangisursuro.
Iti babaen ti trimester system, magudua ti 201 school days iti tallo a term no sadinno a ti umuna a term ket mangrugi intono Hunyo agingga iti Setyembre; maikadwa a term: Setyembre agingga iti Disyembre; maikatlo a term: Enero agingga iti Marso 2027.
Kabayatanna, namnamaen a mangiparuk-at ti Department of Education ti pinal a policy guidelines kadagiti sumarsaruno nga aldaw kalpasan ti konsultasyon kadagiti stakeholder.
