LAOAG CITY – Inpaayan ti gobierno ti United Arab Emirates (UAE) ti royal clemency ti sumurok 115 a Pilipino a convicted kadagiti nagduduma a kaso iti pagilianda kas paset ti obserbasion ti Ramadan ken ti umas-asidegen nga Eid Al-Fitr.
Nagyaman ti Philippine Embassy ti gobierno ti United Arab Emirates iti panangidaulo ti Presidente daytoy a ni Sheikh Mohamed bin Zayed Al Nahyan, Vice President ken Prime Minister Sheikh Mohammed bin Rashid Al Maktoum iti inaramid a pannakaipaay ti clemeny kadagiti Pilipino.
Iti maysa a rakurak, inpadanon ti embahada a daytoy a tignay ket mangipasimudaag ti ‘true spirit of mercy’ nangruna ita nga obserbasion ti Ramadan nga isu ti konsepto ti panagkaykaysa.
Maibilang a daytoy ket maysa a wagas iti pannakaipaay ti clemency kadagiti Pilipino para iti naun-uneg ken natibtibker a koneksion ken panagkadua iti nagbaetan ti Pilipinas ken ti United Arab Emirates.
Kabayatanna, pinatgan ti Philippine Embassy ti humanitaraian principles ti United Arab Emirates para iti pannakaipaay ti agtultuloy a suporta kadagiti Pilipino a manarimaan nga adda iti pagilianda.
