LAOAG CITY – Inlungalong ni ACT-CIS Rep. Erwin Tulfo ti maysa a gakat tapno tulungan ti gobierno iti panagpaagas kadagiti ubbing nga addaan ti sakit a biliary atresia.
Segun ken ni Rep. Tulfo, adda ti 200 nga ubbing ti makapaspasar ti biliary atresia ditoy pagilian iti agdama ken kasapulanda ti alisto a panagpaagas.
Ti laeng liver transplant ti solusion dagiti maladaga wenno ubbing nga agsagsagaba ti nasao a sakit isu a masansan a saandan a madanon pay ti tawenda a dua gapu iti marikriknada.
Kunana nga aggapu kadagiti marigrigat a pamilia ti makapaspasar ti nasao a sakit isu a ti problema ket pinansial.
Gapu iti daytoy, kalikagumna a tulungan ti gobierno dagiti maseknan nga ubbing uray ti kagudua ti balor ti panagpaopera dagitoy.
Nadakamat a ti biliary atresia ket saan a gagangay a klase ti sakit manipud iti pannakaipasngayna ken adda ti pakainaiganna iti liver.
Awan pay ti nalawag a medical explanation no kasano a maala dagiti maladaga ti nasao a sakit.
