LAOAG CITY – Maysa nga agtawen ti tallo nga ubing idiay Redland, Queensland ti simrek iti maysa a claw machine ken kinasapulan ti tulong dagiti pulis tapno ma-rescue daytoy.
Basar iti post iti online ti Queensland Police Service, agpaspasiar ti pamilia ti ubing a ni Ethan iti Capalaba Shopping Centre idi malabsanda iti claw machine a napnoan ti Hello Kitty stuff toys.
Segun iti ama ti ubing a ni Timothy Hopper, saanna a nasiputan idi a kellaat a simrek ni Ethan iti prize chute wenno ti abot no sadinno maregregreg ti premio. Kalpasanna ket immuli daytoy iti paset ti claw machine a pakasarakan kadagiti stuff toys.
Ti claw machine ket maysa a klase ti arcade game a masansan a makitkita kadagiti entertainment center, arcade ken mall.
Daytoy ket maysa a mekanikal nga aparato nga addaan ti crane nga attached a claw a mabalin a bumaba ken umuli ken mabalin a makontrol ti player usar ti pagpindutan wenno joystick.
Ti gagem ti claw machine ket para iti player nga alaen dagiti premio iti uneg ti aparato babaen ti claw. Ti claw ket masansan nga isu ti mangala kadagiti premio kas kadagiti ay-ayam, stuff toys wenno pakairaraman dagiti candy.
Idi saan a makaruar nga agmaymaysa ni Ethan, ditoyen a nagkiddaw ti tulong dagiti nagannak kadagiti pulis. Iti panag-rescue ken ni Ethan, nagdesision dagiti pulis a buongen laengen ti sarming ti claw machine.
Natalged a nairuar ni Ethan kalpasan ti 15 a minuto a panagtalinaed iti claw machine. Awan met ti sinagabana nga aniaman a sugat.
