LAOAG CITY – Maysa a lalaki idiay Texas, USA ti nagballigi a nakagun-od ti world record gapu iti koleksionna ti 1,308 pieces dagiti memorabilia nga adda ti pakainaiganna iti pimmusay a pop star a ni Selena Quintanilla.
Ni Andrew Longoria, residente ti Lake Jackson ket nangisubmitir ti aplikasion iti Guinness World Records kalpasan nga addaan isuna ti adu a koleksion.
Kinumpirmaran ti Guinness a nagun-od ni Longoria ti titulo a “Largest Collection of Selena Memorabilia” gapu ta ti 1,308 memorabilias daytoy ket officially licensed amin ken awan ti peke.
Karaman kadagiti koleksion ni Longoria ket dagiti album, tote bag, T-shirt, munmunyeka ken official-branded Selena maong pants.
Nagbalin a fan ni Longoria ti sikat a singer idi 1997, kalpasan nga ingatangan isuna ti lolana ti CD a “Dreaming of You,” dua a tawen ti napalabas idi natay ni Selena.
Inbatad ni Longoria, ti pannakahiligna iti panangkolektar ket impluwensia ti lolana nga addaan met ti adu a koleksion dagiti memorabilia ni Elvis Presley.
