LAOAG CITY – Umabot laengen iti 10 a milyon a pisos ti nabatbati nga utang ti Laoag City General Hospital manipod iti 37 a milyon a pisos a nausarda iti serbisio idi tawen 2023.
Naammoan a karaman ditoy ti 10 a milyon a pisos ket ti hazard pay nga adda ti nasurok a pito a milyon a pisos ken ti Maintenance and Other Operating Expenses nga adda ti nasurok a dua a milyon a pisos.
Segun ken ni Mr. Edgar Pascual, ti City Accountant iti lokal a gobierno ditoy siudad ti Laoag, dagiti nabayadanen ket ti kuriente ken adda ti immunan a binayadanda a tallo a bulan nga utangda idi 2023 idinto nga ita a tawen 2024 ket agbaybayad ti nasao nga ospital ti kuriente iti usto a wagas.
Inbatadna a basar iti rekordda ket in-inuten a makabaybayad ti nadakamat nga ospital sipod idi Disiembre 31, 2023 babaen iti tulong ti lokal a gobierno ken gapu ta adda ti total subsidy a 19 a milyon a pisos iti tawen 2023.
Inlawlawagna a maibasar iti Philippine Health Insurance Corporation collection idi 2023 ket adda ti 21.48 milyon a pisos.
Mainaig iti daytoy, mangnamnama ti Laoag City Accountant nga ita a tawen 2024 ket ad-adda pay a dakkel ti mapastrek iti Laoag City General Hospital nangruna ket naammoan nga adda ti PhilHealth collection-da a 2.7 milyon a pisos para laeng iti bulan ti Enero idinto nga umabot met iti 4.5 milyon a pisos iti bulan ti Pebrero.
Kabayatanna, naammoan a ti nagbalin a parikotda maipapan iti Philippine Health Insurance Corporation collection-da ket ti pannaka-hack ti ahensiada iti napalabas a tawen.
