LAOAG CITY – Umaboten iti 139 a road crash incidents ti nairekord ditoy probinsya sipud Enero primero agingga iti Agosto 26 ita a tawen.
Daytoy ti inbatad ni Police Major Jephre Taccad, ti pannakangiwat iti Ilocos Norte Police Provincial Office (INPPO) kabayatan ti naisayangkat a press conference.
Segun ken ni Taccad, manipod iti nasao a bilang ket adda ti 31 a reckless imprudence resulting in homicide, 52 ti reckless imprudence to physical injuries ken 56 ti damage to property.
Inlawlawag na a ti kangrunaan a rason dagiti napasamak nga insidente ket gapu iti miscalculation no sadinno a 35 nga insidente ti nairekord, 20 ti driving under influence of liquor, 20 a reckless driving, 11 nga overspeeding ken 8 asudden stop or turn.
Nagpanawagan ni Taccad a masapol ti naan-anay a panagannag iti panagmaneho tapno makasubli a natalged iti bukod a pamilya.
