LAOAG CITY – Umaboten iti agarop 180 a tattao ti tiniliw dagiti otoridad iti maikadwa nga aldaw a pannakaiyuswat ti nadamsak a tignay-protesta idiay France.
Namonganay ti nalawa ken nadamsak a tignay-protesta kalpasan ti panangpatay dagiti otoridad iti agtawen ti 17 nga agtutubo a nabigbig a ni Nahel M.
Immuna iti daytoy, nagkedked ni Nahel a nagsardeng iti traffic stop iti Nanterre isut gapuna a kinamat dagiti otoridad ken pinaltugan da.
Malaksid iti panangpaltog dagiti otoridad iti agtutubo ket pinuuran da pay ti lugan na.
Gapu iti nadamsak a tignay-protesta ket nagpaawag ni French President Emmanuel Macron ti crisis meeting ken inawagan na ti mapaspasamak a kinadamsak iti pagilyan da kas “unjustifiable”.
Kabayatanna, adda ti 40,000 a police officers ti naiwaras iti intero a France tapno sangwen da dagiti demonstrador.
