LAOAG CITY – Kinumirmaran ni Barangay Chairman Noel Quemado iti Barangay Nalasin, Paoay, Ilocos Norte nga umaboten iti agarop maysa a milyon a pisos ti balor dagiti nadadael iti benneg ti agrikultura ti nasao a barangay.
Daytoy ket kalpasan iti agarop makabolan a pinagtudtudo na gubuay ti habagat ditoy probinsya.
Maipalagip a maysa ti Barangay Nalasin kadagiti lugar idiay ili ti Paoay a nalayos gapu ti habagat a nakadadaelan dagiti ado a mulmula ti nasao a lugar.
Kabayatanna, inbatad ti kapitan a dagiti nagduduma a proyekto iti barangay da kas iti Philippine Rural Project a pinondoan iti World Bank, Municipyo ken probinsya ket saan a naapektaran ken dandanin malpas.
Innayon na nga adda pay iti flood control project a maaramid iti dayaen iti Nalasin Elementary School nga agbalor iti 49 a milyon a pisos nga aggapo ken ni Senador Loren Legarda ken nayunan ti gobierno probinsyal iti 106 milyon a pisos.
Nupay kasta, kuna na a ti flood control project a manarimaan a maiyus-uswat ti barangay da ket temporaryo pay laeng a naisardeng gapu ti agdama a sitwasyon ditoy probinsya.
