Inpakaammo ni United States President Joe Biden a pirmaannan ti military aid bill kalpasan a naipasa iti Senado ti singasing a mangipaay ti nasurok a $95-B a tulong para kadagiti pagilian ti Ukraine, Israel, ken Taiwan.
Segun ken ni President Biden, pirmaanna a dagus daytoy apaman a nakadanon iti opisinana tapno rugian ti Estados Unidos ti mangipatulod kadagiti armas idiay Ukraine ita a lawas.
Mainaig iti daytoy, makaawat ti Ukraine ti $61-B a tulong idinto a ti $26-B ket maipan iti Israel ken humanitarian assistance iti Gaza, Sudan, ken Haiti no sadinno karaman pay iti singasing a $8-B a suporta iti militar ti Taiwan.
Inlawlawag ni Biden a daytoy nga addang ket maysa a mensahe iti sibubukel a lubong mainaig iti bileg ti American leadership no sadino nga itultuloy na nga itandudo ti demokrasia, kapia ken ti pannakilaban iti tyranny ken oppression.
