LAOAG CITY – Winaya-wayaanen ti PNP-Badoc da Jorcon Victor Sales y Paz, agtawen ti 37, baro, negosyante, residente iti Brgy. 1 Sta. Rita iti ili ti Bacarra, nangiturong ti maysa a ford raptor ken ti kadwa na a ni Vincent Dancel, agtawen ti 23 ken residente iti Brgy. 20 San Miguel ditoy siudad ti Laoag.
Daytoy ket kalpasan a nakapagpiyansa dagiti dua iti sag-116 a ribo a pisos da para iti kaso da a panaglabsing iti Republic Act (RA) 10591 wenno “Comprehensive Firearms and Ammunition Regulation Act” ken ti comelec gun ban.
Maipalagip a kabayatan a rumuar ditoy probinsya dagiti maseknan ket nainspeksyon ti lugan da iti comelec checkpoint no sadinno a nadawat ti OR ken CR ti lugan.
Iti pananglukat ni Sales ti kahon ti armscor ket naduktalan nga adda ti nakaipalaon a 14 a bala ti caliber 40.
Naamoan a ni Sales ket agkandidato a para bise mayor iti ili ti Bacarra.
