LAOAG CITY – Agtipon a ragsak ken danag ti agdama a marikrikna ni Mr. Glenn Flores, ama ni Gerick Flores, agtawen iti 11 nga agad-adal iti Maglaoi Elementary School a napili nga atleta ditoy probinsia a mangbukel ti baseball group a mangibagi ti pagilian iti international competition a maiyuswat idiay Japan.
Segun kenkuana, kas maysa a nagannak ket saan a mailadawan ti napalaos a kinaragsakna apaman a naammoanna daytoy a napintas a damag para iti anakna.
Nupay kasta, kunana a saan a maliklikan nga adda ti panagdanagna gapu ta saanda met ammo ti mabalin a pangalaanda iti usaren ti anakna a panggastos iti pannakipasetna iti international competition.
Inbatadna nga ubing pay laeng ni Gerick ket mahilig ti panagay-ayamna iti baseball iti kataltalonan a mabalin nga isu ti ad-adda pay a nang-asa iti kapabilidadna.
Inlawlawagna nga aniaman ti desision ti anakna maipanggep iti panagay-ayamna iti baseball ket inpasiguradona ti panangipaayna ti naiget a suportana kenkuana.
Innayonna nga iti baet a makumikom ti anakna kadagiti maisaysayangkat a panagsanayna ket saanna met mabaybay-an ti panagadalna.
Maipalagip nga inrakurak ni Mrs. Helen Rose Domingo, mangidadaulo ti Provincial Sports and Development Office a kabayatan ti try out ket karaman ni Flores iti Top 10 a napili.
