LAOAG CITY – Umabot iti 811 a ribo a pisos ti balor dagiti nadadael iti pannakauram ti pagtaengan ti pamilya Javier iti Barangay Nangalisan-B ditoy ciudad ti Laoag.
Daytoy ti inbatad ni Fire Senior Inspector Ronald Castillo, ti firemarshall iti Bureau of Fire Protection ditoy ciudad.
Segun kenni Castillo, iti inyuswat da a naan-anay nga imbestigasyon, datin nga agpapaupa ti pamilya Javier kadagiti computer nga isu ti karaman kadagiti nauram ken dagiti nagduduma a partes daytoy.
Immunan nga inrakurak ni Castillo a nangrugi ti apoy iti altar iti uneg ti pagtaengan a nauram ken basar iti panagimbestigar da ket ti kuryente a maus-usar iti altar ken dagiti waya ti possible a nalunag.
Kuna ni Castillo a malaksid iti daytoy ket naduktalan a ti fuse box iti pagtaengan ket naka-jamper wenno naikkan ti barot nga isu ti ad-adda a nangdegdeg ti uram.
Kabayatanna, pinalagipan ni Castillo ti publiko a kitaen a nalaing dagiti appliances ken dagiti silaw a no saan a maus-usar ket ideppen.
