LAOAG CITY – Naglikudan ni Barangay Chairman Sammy Aquino iti Barangay 24 ditoy ciudad ti Laoag ti alegasyon kenkuana ni Mr. Jay-ar Manuel a dinangran na daytoy.
Segun kenni Aquino, idi limmabas iti pagtaengan da Manuel ket inbaga kenkuana ti uliteg ni Jay-ar a ni Mr. Jimmy Manuel nga agprobprobokar ken nabartek.
Inlawlawag na a gapo iti daytoy ket kinsarita na ken iniggam na ti short pants ni Jay-ar kageddan ti panangpaawag na ti pulisya gapo ta maipagarop a kanayon a kastoy ti ar-aramiden ti maseknan tunggal mabartek.
Kunana nga idi iggem na ni Jay-ar ket dimteg met ni Jimmy Manuel ken kinasarita na ti baro ken ditoy metten nga inwadag ti maseknan ti ima ti kapitan, bulon na metten a nagtaray.
Inpetteng na nga iti panagtaray ni Jay-ar ket naidaramudom, nabati na ti tsinelas ken cellphone na nga ibagbaga ti baro a napukaw kabayatan iti daytoy ket adda iti Kagawad nga isu ti nangitedan ti nakapidot.
Dinakamat na nga idi dimteng ti pulisya ket napan da iti pagtaengan ni Jay-ar ngem saan a mabirukan daytoy agpapan maisursurat ti damag.
Mainaig iti daytoy, kinumpirmaran met ni Mr. Jimmy Manuel a no tunggal mabartek ni Jay-ar ket kanayon a mangriribok.
Inbatad na nga isuna ti nangibaga kenni Kapitan Aquino ti ar-aramiden ni Jay-ar ken nakita na a mismo ti panangiggem ti opisyal iti short pants daytoy.
