LAOAG CITY – Nagtalinaed nga unstable ti biktima ti disgrasya iti Badoc Bridge iti Barangay Pasuc iti ili ti Badoc.
Daytoy ket ti driver ti tricycle a ni Avelino Laforga, agtawen ti 73, naasawaan ken residente ti Barangay Pasuc iti ili ti Badoc.
Immuna iti daytoy, nagbaliktad ti SUV a Toyota Fortuner nga agmaris ti puraw a ni Lisa Andrea Romero y Indionela, agtawen ti 19 ken residente ti Poblacion 2 iti ili ti Pagudpud kalpasan a dinungparna ti tricycle nga inturong ni Laforga iti nadakamat a lugar.
Naamoan nga adda ti pasahero ni Laforga a nabigbig a ni Razel Fernandez, agtawen ti 51, naasawaan ken residente ti Barangay Parang iti ili ti Badoc.
Inbatadna a basar iti inwayatda nga imbestigasion, kabayatan a dumaldalyasat ti SUV nga agturong nga agpa-abagatan ket kellaat a napukawan ti kontrol ti manibela ti driver.
Gapu iti daytoy, kunana nga immagaw ti linya ti SUV a nangitunda ti pannakadungpar na iti sumungsungad a tricycle no sadinno a naitapwak iti rangtay ti tricycle driver.
Nagsagaba ti sugat iti nagduduma a paset ti bagi ti driver ti tricycle ken ti pasaherona nga insigida met a naitaray dagitoy iti Corpuz Clinic and Hospital idiay Sinait, Ilocos Sur idinto ti driver ti SUV ken dagiti kakaduana ket nagsagaba da ti minor injuries.
Naammoan a rumrummuar iti imbestigasion a maipagarup a nakaturog ti driver ti SUV.
Kabayatanna, inpakaammo ti Philippine National Police iti ili ti Badoc a nakapagsaritan ti dua a partido ngem awan pay ti naiparuk-at a naan-anay a detalye no ania ti napagsasaritaan da.
