LAOAG CITY – Simmangon ti korte ni dati a Mayor Marynette Gamboa iti ili ti Dingras iti sala ni Judge Felix Salvador iti RTC Branch 17 gapo iti kaso na a murder.
Daytoy ti kinumpirmaran ni Atty. Juanito Antonio, Legal Counsel ni Gamboa.
Segun kenni Antonio, naitaray iti ospital ti dati a mayor gapo ta ngimmato ti blood pressure na ken sinertipikaran ti doktor na ti uncontrolled hypertension.
Kiniddaw ni Antonio iti huwes a saan pay a maipisok iti pagbalodan ni Gamboa tapno mamonitor ken mastabilize ti blood pressure na ken maliklikan a kumaro ti kondisyon na.
Inlawlawag na a saan pay maikonsiderar ni Gamboa a regular prisonner gapo ta saan met pay a nasentensyaan isuna.
Iti agdama, maob-obserbaran pay laeng ni Gamboa iti ospital.
Dakkel ti pammati ni Antonio a mai-lift ti warrant of arrest babaen ti panangipila da ti motion to quash gapu ta saan a nainkalintegan ti pannakaisyu na.
Innayon na nga adda ti Administrative Order a mangipawil a malukatan daytoy a kaso sakbay a naparuk-atan ti warrant of arrest.
