LAOAG CITY – Kinumpirmaran ni PMaj. Jephre Taccad, ti pannakangiwat ti Ilocos Norte Police Provincial Office a pulis iti driver ti kotse a nangdarusdos dagiti tallo a behikulo iti Sarrat Bridge a sakupen ti Barangay 20 iti ili ti Sarrat.
Kabayatan ti naiyuswat a press conference iti PNP Sarrat station, inpakaammo ni Taccad a ti suspek a pulis ket nakadestino iti PNP-Piddig ken agnanaed iti ili ti Dingras.
Mainaig iti daytoy, inpakaammo ni Taccad a naipadalan iti liquor test ti maseknan a pulis ken positibo daytoy idinto a maiyur-uray ti resulta ti drug test na.
Immuna iti daytoy, inbatad ni Taccad a basar iti pannakikoordenar da iti PNP-Piddig ket naka-off duty ti pulis idi napasamak ti insidente.
Inpasigurado met ti opisyal nga awan ti panagcover-up ti Ilocos Norte Police Provincial Office iti pulis ken masurot dagiti paglintegan pakairamanan ti pannakaitultuloy ti imbestigasyon.
Nagtalinaed ti suspek a pulis iti kustodyar ti Ilocos Norte Police Provincial Office ken manamnama a sumango ti kaso kriminal ken administratibo.
Kabayatanna, inpakaamm ni PCapt. Reynald almazan, Deputy Chief iti PNP Sarrat nga awan pay ti panagsasarita dagiti pamilya a karaman iti insidente.
Maipalagip nga natay ti maysa a babai ken sangapulo dagiti nasugatan gapu iti pannakadarus-ros ti trcicyle, kurog-kurong ken motorsiklo a nagluganan dagitoy babaen iti pulis a nangiturong ti kotse.
