LAOAG CITY – Nagkiddaw ti pagilyan nga Estonia ti konsultasyon kadagiti dadduma a miembro ti NATO kalpasan a linabsing ti Russia ti airspace daytoy.
Daytoy ket kalpasan nga adda ti tallo a Russian fighter jets a dimmalan iti airspace da.
Kinondenar met ti Foreign Ministry ti Estonia ti inaramid ti Russia gapo ta tallo a Russian MiG-31 fighter jets ti simrek iti tangatang a paset iti pagilyan nga awanan ti pammalubos ken nagpaot dagitoy iti 12 a minutos iti Gulf of Finland.
Segun iti pannakangiwat ti NATO, nagresponde a dagus dagiti dadduma a kakadua da iti military ken nalapdan da ti Russian aircraft.
Kageddan iti daytoy ket inawagan na a saan a nainkalintegan ti addang ti Russia ngem binigbig na met ti abilidad ti NATO iti panagresponde na.
Naamoan nga uray dagiti pagilyan nga Italy, Finland ken Sweden ket simmurot iti mission ti NATO ngem naglikudan met ti Russia a linabsing na ti airspace ti Estonia.
Kabayatanna, daytoyen ti maikapat a daras a simrek ti Russia ti airspace ti Estonia.
Kalikagom met ni European Commission President Ursula von der Leyen a mapatawan ti nadagsen a pannusa ti Russia gapu iti ar-aramiden na a panaglabsing iti airspace ti miembro da.
Maipalagip nga immunan nga inreklamo ti Poland ken Romania ti panaglabsing ti Russia iti airspace da.
