LAOAG CITY – Inbatad ni Police Lt. Col. Adrian Gayuchan, ti chief of police iti ciudad ti Batac a dua a reklamo ti inpila da kontra iti estudyante a babai a natiliw iti entrapment operation iti paset ti Barangay Quiling Norte iti nasao a ciudad.
Segun kenni Gayuchan, karaman kadagiti inpila da a reklamo kontra iti suspek a ni Lyca Avbril Pinpin, agtawen ti 19, ken residente iti Barangay Quiling Norte iti nasao a ciudad ket ti panaglabsing iti Republic Act 9262 wenno Anti-Violence Against Women and their Children Act of 2004 ken ti Republic Act 10591 wenno Illegal Possession of Firearms.
Inpakaammo ni Gayuchan a malaksid kadagiti dua nga inpila da a reklamo ket manamnama nga addan to pay ti maysa a naun-uneg nga ipila da a kaso kontra ken ni Pinpin ngem saan da paylaeng a mabalin nga ipublikar.
Innayon na nga adda pay ti naun-uneg a makaigapo no ania ti namonganayan ti panangipangpangta ti suspek iti biktima ngem saan paylaeng a makaipaay ti naan-anay a detalye gapu ta sensitibo daytoy.
Mainaig iti daytoy, kuna ni Gayuchan a naamoan da nga addan ti nasurok a maysa a tawen nga agkarelasyon ti suspek ken biktima.
Maipalagip nga iti naiyuswat nga operasyon ket naala dagiti otoridad iti ikot ti suspek ti maysa a paltog wenno paltik.
Agpapan ita ket saan pay a naestablisar dagiti otoridad no naggapwan ti paltog a naala iti ikot ni Pinpin.
