LAOAG CITY – Inlawlawag ni dati a konsehal Marc Dennis del Castillo iti ili ti Solsona no apay a saan a napan nagpalawag iti konseho mainaig iti isyu iti Pabahay program.
Daytoy ket iti baet a namintallon a daras nga inimbitaran ti konseho kabayatan ti panagtultuloy ti imbestigasyon mainaig iti nasao nga isyu.
Inbatad na nga addan ti inpatulod na a palawag na iti Department of Social Welfare and Development Office (DSWD) iti rehiyon uno.
Innayon na a no iti korte ti mangimbitar kenkuana ket isunton ti pagpalawagan na.
Immun-una iti daytoy, inpakaammo ni Sangguniang Bayan Member Atty. Lourdines dela Cruz iti ili ti Solsona nga iti maikatlo a gundaway a pannakadenggeg ti isyu seknan ti Pabahay Program ket saan a nagatendar ni dati a konsehal Marc Dennis del Castillo.
Nupay kasta, kuna ni dela Cruz a dandanin a maileppas ti pannakatratar ti isyu ken mapagsungbat dagiti adda iti likudan ti anomalya iti kabiitan a panawen.
Inpakaammo na nga iti naiysuwat a panagdenggeg, dimmatag dagiti opisyal ti Landbank, dagiti asosasyon a nabuangay para iti Pabahay ken ni dati a Municipal Social Welfare Officer Bella Batalleros.
Inbatad na a bayat ti panagdenggeg ket maymaysa ti sungbat dagitoy ken itudo da ti dati a konsehal nga adda iti likudan ti pannakapukaw ti pondo a P23 a milyon para iti Pabahay.
Kuna ni dela Cruz a gapu iti saan a panagpakpakita ni del Castillo ket nagmosyon ti maysa kadagiti miembro ti adhoc committee a ni Sannguniang Bayan Member Marvin Pascua a maisyu ti subpoena manipod iti korte tapno agatendar iti panagdenngeg ti dati a konsehal.
Immuna iti daytoy, inbatad ni konsehal dela Cruz nga amin a dokumento a dimmalan iti bangko ken nausar iti proseso seknan iti pondo para iti Pabahay ket nainagan amin ken ni del Castillo, banag a maikanniwas iti linteg.
