LAOAG CITY – Inbatad ni Police Major Nelson Apostol, ti mangidadaulo iti CIDG ditoy probinsya a naipila dan ti kaso kriminal kontra iti security guard naka-assign iti Department of Education (DepEd)-Ilocos Norte.
Segun kenni Apostol, ti naipila a reklamo kontra iti gwardya ket ti Republic Act (RA) 10591 wenno Illegal Possesion of Firearms gapo ta awan ti naipakita na a dokumento ti paltog a maysa a cal. 9mm a service firearm na.
Namunganay daytoy kalpasan a nakaawat ti CIDG ti report a dagiti gwardya iti DepEd-Ilocos Norte ket awan ti lisensya ti service firearm da a cal. 9mm.
Inlawlawag pay ni Apostol a ti pannakisarita kadakuada ti agtagikua ti 1980 Security Agency ket inpetteng ti maseknan a manarimaan ti pannakiproseso ti lisensya ti paltog ngem awan ti naipakita na dokumento.
Kuna pay ni Apostol nga awan ti serial number ti nadakamat a paltog isut gapo na a saan a mai-renew daytoy.
Maipalagip nga inbaga ti security guard iti Bombo Radyo a lima a bolan na pay laeng iti trabaho na iti DepEd-Ilocos Norte ken ti paltog ket pagsinsinnublatan da ti karelyebo na a gwardya.
Innayon na a ti ammo da ket lisensyado ti service firearm da gapu ta adda met ti lisensya na kas security guard.
Inpakaammo pay ti guwardya nga intawag na iti boss na ti napasamak ngem maipagarop a nagunget ti maseknan ken kwinestyunaran na daytoy no apay inpakita na ti service firearm da.
Mainaig iti daytoy, ad-adalen pay ti CIDG no mairaman a mapilaan ti reklamo ti agtagikua ti agency a pagpaayan ti nasao a security guard.
Iti agdama, naipakustodyar pay laeng ti guwardya iti PNP-Laoag ken nairekomendar ti 100 a ribo a pisos a piyansa na para iti temporaryo a pannakawaya-waya na.
