LAOAG CITY – Inpakaammo ni P/Lt/Col. Jephre Taccad, ti Provincial Operation Management Unit iti Ilocos Norte Police Provincial Office nga addan ti Person of Interest a kitkitaenda iti napasamak a pammaltog a nakatayan ti maysa a lalaki a ni Andres Tungpalan Daquioag, agtawen ti 59, addaan ti live-in partner ken residente ti Brgy. 19 ditoy siudad ti Laoag.
Segun kenkuana, adda ti uppat nga anggulo a kitkitaenda iti insidente ngem saanna pay laeng nga inbuksilan gapu ta agtultuloy pay laeng ti iwaywayatda nga imbestigasion.
Nupay kasta, rumrummuar iti impormasion nga adda ti pakainaiganna iti love triangle wenno trabaho ti biktima iti nasao a pammaltog.
Naammoan nga agkasar koma iti kabigatanna ti biktima idi napasamak ti nakaam-ames nga insidente.
Maipalagip a natay ti biktima kalpasan a napaltu-paltogan iti likud ti ulona iti namindua a daras iti Brgy. 5, San Pedro ditoy siudad ti Laoag.
Immuna iti daytoy, narekobre dagiti otoridad ti dua a kapsula ti bala ti paltog a maipagarup a Caliber .45.
