LAOAG CITY – Inadmitir ni Mr. Kevin Raguinan, agtawen ti 31, residente iti Barangay Manalpac iti ili ti Solsona a namindua a daras a nasipat na ti agtawen ti 11 a menor de edad.
Inlawlawag na a nasakit ti nakem na kalpasan a pinagsasawan ti ubing ti dakes ti ina na.
Malaksid iti daytoy, inbaga ni Raguinan nga inlunod pay ida ti ubing no sadinno nga inbaga na a matay da koman a sangapamilya.
Immun-una iti daytoy, kuna ni Raguinan a nagriri ti baro na ken ti agtawen ti 11 a babai ken idi napan naganawa ti ina ken ikit na ket ditoyen pinagsasawan ti biktima ti agkakadakes a sarita.
Inpasingked na a saan a tinengngel ti ina ken anak na ti biktima idi sinipat na gapu ta mapaneknekan daytoy dagiti nakakita iti napasamak.
Innayon na a saanna a nagustwan ti inaramid ti ubing iti ina na a maysan a senior citizen kangrunaan na ket saan da pay a napadasan a pinagsasawan ti dakes daytoy.
Inpakaammo pay ni Raguinan a nakainom ti nasanger idi nasipat na ti nasao a menor de edad.
Kabayatanna, inbaga ni Raguinan a kalpasan iti napasamak ket nakasarita na ti ama ti ubing ken nagpadespensar.
Kuna na nga inawat met ti ama ti ubing ti panagpadespensar na ken naibaga na pay a bareng adda ti pagbutngan na gapu ta uray isuda iti ina na ket maipagarop a saan a kabuteng ti menor de edad.
Nupay kasta, inbatad ni Raguinan a saan pay a napakawan ti uliteg ti ubing ken inkamang da ti napasamak iti DSWD ngem nakasagana a mangsango iti possible a bunga ti inaramid na.
Kabayatanna, inbaga ti uliteg ti ubing a ni Mr. Joven Pasion iti Barangay Manalpac iti ili ti Solsona a pursigido da a mangireklamo kadagiti agina nga Raguinan tapno agnakem da iti inaramid da iti kaanakan na.
