LAOAG CITY – Inlawlawag ni Mayor Alexander Calucag iti ili ti Solsona a basar ti mensahe ti nagpangta ket tallo a bomba ti maipagarop a naimula uneg ti municipyo ken maysa iti ruwar.
Segun kenni Calucag, ti mismo a sekretarya na ti makasarsarita ti nagtawag ken binagaan na pay daytoy a rumwaren gapo sa saan na a kayat a madangran ti empleado.
Malaksid iti daytoy, kuna ni Calucag a naipakammo pay kadakuada nga iti uneg ti 45 a minutos ket bumtaken dagiti naimula a bomba.
Mainaig iti daytoy, awan ti ammo ti Mayor no apay nga inaramid ti nagpangta ngem mabalin mangbutbuteng laeng wenno kayat na a gulwen ti konsentrasyon dagiti empleado ti municipyo.
Kunana nga uray siasinno ti mang-text iti numero ti suspek ket adda latta ti reply ken sumungbat iti tawag.
Inbatad ti Mayor nga ado ti naperwisyo ti pangta gapo ta nagpaayab pay ti SWAT ken adda ti K9 tapno mangkita iti nasao nga insidente.
Saan met a patyen ni Calucag a gapo ti pulitika ti pasamak no diket aramid laeng dagiti awan iti nasayaat a panagpanpanunut.
Kabayatanna, nagyaman ni Calucag gapo ta negatibo met laeng ti resulta ti bomb threat.
