LAOAG CITY – Immapela ni Brgy. Chairman Angel Ramil iti Brgy. 32-Corocor iti ili ti Bacarra kadagiti kabarangayanna a nasken a bantayan dagiti annak tapno maliklikan ti risgo.
Daytoy ket kalpasan a dua manipod iti tallo nga agkakasinsin nga agpapada nga agtawen ti tallo ti natay manipod iti pannakalmes da iti waig iti nasao a barangay.
Kuna ni Ramil a nu aniaman ti ar-aramiden a trabaho ket saan a pagliwayan a siputan dagiti annak.
Immuna iti daytoy, inpakaammo ni Ramil a basar iti pannakisarsarita na iti ina kadagiti maysa a natay ket manarimaan ti panaglaba na idi napasamak ti insidente ken kampante nga adda laeng iti lawlawda nga agay-ayam ti anak na.
Innayun na anga iti naunday a panawen a panagnaed na iti barangay da ket daytoy ti umuna a gundaway nga adda ti nalmes iti lugar da.
Kuna na nga idi napasamak ti insidente ket nairana nga awan ti agpapaay iti asideg ti waig agraman dagiti nataengan nga isuda ti masansan a mangsitsita kadagiti ubbing ka.
Inbunannag na a gapu iti pasamak ket plano na a maikkan ti signages iti lugar tapno maliklikan ti aksidente pakairamanan ti pannakisarita kadagiti nagannak seknan iti naiget a panagbantay iti annak.
Maipalagip a naggigiddan dagiti natay kadagiti nalmes nga agkasinsin ket isuda Abriana Kelly Pascua kenni Rheid idinto a ti nakalasat ket ni Arjay Pascua.
