LAOAG CITY – Personal a napan bimmisita ni Mayor James Bryan Alcid iti merkado publiko ditoy ciudad ti Laoag no sadinno a naimatangan na ti adon a nagbaliwan ti nasao a pasdek.
Segun kenkuana, ti tiendaan ti maysa kadagiti kangrunaan nga economic enterprise ti gobierno siudad, rason a rumbeng a maikkan ti naan-anay nga importansia.
Inpakaammo na nga adon ti nagbaliwan ti itsura ti tiendaan kalpasan a napintaan.
Innayon na nga adda pay ti plano a pannakatarimaan ti tiendaan tapno ad-adda a mapapintas ti serbisio ken pakalag-anan dagiti aglaklako ken aggatgatang.
Malaksid iti daytoy, inbatad ni Mayor Alcid nga addan ti pannakisarita na kadagiti aglaklako iti nasao a pasdek tapno maamoan dagiti nagduduma a kiddaw ken isingasing da para iti napinpintas ken al-alisto a pannakasolbar dagiti problema iti merkado publiko.
