LAOAG CITY – Inbatad ni Fire Inspector Edison Reyes iti Bureau of Fire Protection (BFP) iti ili ti Bacarra a saan da pay a maibaga no mano ti balor dagiti nadadael iti pannakauram ti maysa a funeral parlor iti Barangay Corocor iti nasao nga ili.
Daytoy ket gapu ta manarimaan pay laeng ti iyus-uswat da nga imbestigasyon.
Immun-una iti daytoy, inbaga ni Reyes nga iti inisyal nga imbestigasyon da ket naamoan a pinuuran dagiti agbanbantay iti nasao a pasdek dagiti nalaylay a sabsabong ken dadduma a pagbisti iti compose pit wenno pagpuuran.
Inbaga na a kalpasan a nasindian da dagiti basura ket pimmanaw dagiti maseknan a napan nangaldaw.
Gapu iti kinapigsa ti naangin iti lugar ken kinabara ti panawen ket alisto a nagramram ti apoy ken adda pay ti naitayab iti atep ti stock room ti funeral parlor no sadinno a daytoy ket anahaw.
Gapu iti napasamak ket nairaman pay a nauram ti lugan ti funeral parlor.
