LAOAG CITY – Kinumpirmaran ni Police Major Ryan Retotar, ti chief of police ti PNP-Dingras nga adda ti nasurok a 15 a persons of interest seknan iti naipatulod a bomb threat iti maysa a mangisursuro iti Dingras National High School – Poblacion Campus.
Segun kenni Retotar, karaman kadagiti nasurok a 15 a persons of interest ket estudyante, nagannak, kasta met dagiti mangisursuro.
Inlawlawag na nga addan ti dua a naimbitaran da ken nagsaludsodan seknan iti nasao a banag.
Inbatad na a posible nga aramid daytoy dagiti nakainom wenno dagiti bully.
Mainaig iti daytoy, kuna ni Retotar a naiget a mabantayan ti nasao a pagadalan iti panagsubli ti klase da.
Maipalagip a nakaawat ti maysa a mangisursuro ti pangta a panagbettak iti nasao a pagadalan a rason ti pannakasuspenso ti klase idi Biyernes.
