LAOAG CITY – Inbatad ti Bureau of Fire protection nga umabot ti 35, 700 ti balor dagiti nadadael iti pannakauram ti maysa a paglakoan ti furniture iti Barangay Bengcag ditoy ciudad ti Laoag.
Inlawlawag ti Bureau of Fire Protection a basar iti imbestigasyon da ket naduktalan a ti nangrugyan ti apoy ket manipod kadagiti internet cable a nagrisak iti batog ti nasao a pagtagilakoan a nakauraman ti atepna.
Maipalagip a nairana a dumalsayat ni Barangay Chairman Jayson Ponce iti Barangay Araniw ditoy ciudad ti Laoag iti lugar idi napasamak ti uram isut gapuna nga insigida a nagsardeng ken timmawag iti Bureau of Fire Protection tapno ipakaammo ti nasao a pasamak.
Inbatad na a kabayatan nga iyur-uray da dagiti bumbero ket nagtitinnulong da a nangiruwar kagiti rattan nga ilaklako ti nasao a pasdek negosyo.
Kuna na a nagpaot iti 15 a minuto sakbay a naan-anay a nasebseban dagiti bombero ti apoy.
Naamoan nga alisto a nagkayamkam ti apoy gapu ta labig ti naiyatep iti nasao a furniture shop.
