LAOAG CITY – Nagkedked nga agkomento ti pamilya ti lalaki a napagkamatay babaen ti panaginom na ti sabidong idiay Barangay 10 iti ili ti Sarrat.
Ti ina ti biktima ket adda idiay Manila idinto a ti ama na ket adda idiay ballasiw taaw, ken ti laeng kabbalay na ket ti kabsat na ken ti lola na.
Nupay kasta, naamoan ti Bombo Radyo manipud iti kasinsin ti biktima ket sakbay ti insidente ket nangeg ti kabbalay na a makirirriri iti cellphone ken sipud iti dayta nga aldaw ket saan dan a nakita daytoy.
Basar ti impormasyon, ti dati a routine ti nasao a biktima ket rumwar iti malem tapno mapan agpakan kadagiti taraken na a manok.
Segun pay iti nakalap nga impormasyon, nagtulag ti biktima ken ti kasinsin na a mapan da mangan ngem idi ayaban nan ti lalaki ket awanen ti puut ti barito.
Inbatad na pay a saan da nga am-ammo ti maibagbaga a nobya ti barito.
Mainaig iti daytoy, basar iti naipaima iti PNP a cellphone ti biktima, adda ti atiddog da a mensahe na a maiturong iti nobya na ngem saanen a maipublikar.
Naamoan a saan pay nga inpadas ti pamilya ti biktima a kinontak ti maibagbaga a nobya ti nasao a barito.
